Welkom

In Mestreech woort get aofgezoonge in de loup vaan d’n tied. Veur eder gelegenheid had de Mestreechteneer z’n leedsjes. En es ze neet waore daan woorte ze gemaak! Dat “make” gebäörde door de lui zelf, miestal kaom dao geine componis aon te pas. De milledieje woorte gewoen “geliend” vaan al bestaonde populair leedsjes. In deen tied keek me neet zoe nej! En noe höb iech ’t euver de jaore veur 1945 want (bekans) alle leedsjes op dees site zien vaan veur deen tied.  ’t Ajdste leedsje sjijnt volges de Belzje perfesser Serrure zelfs trök te goon tot de dertiende of vieftiende iew …..

Zoe is ’n sjat vaan oongekinde weerde oontstande die väöl zeet euver “de Mestreechteneer”. Me zuut aon de leedsjes tot  heer ’t plezeer zeuk. Meh ouch zie sjagrijn klink drin door. Soms geit heer middenin e leedsje inins euver op ’t Hollands. Dèks is dat e teike tot heer serieus weurt!
De leedsjes weure nogalins op versjèllende menere gezoonge. Dat kump, umtot ze vaan ginneratie op ginneratie mondeling doorgegeve woorte. En daan wèlt wel ins get veraandere ……

Iech wins uuch väöl plezeer mèt ’t beluustere en zinge vaan dees Mestreechter sjatte. Iech hoop, tot ouch geer aon dat doorgeve aon volgende ginneraties wèlt mètdoen.

Tiny

DISCLAIMER
Dao is de uterste zörg besteid aon ’t achterhole vaan eventuele rechhöbbende op meziek, tekste en aofbeeldinge die gebruuk zien op dees website. De gepubliceerde tekste en gezoonge leedsjes zien vrij vaan rechte of in ’n hiel inkel geval is, es dat nudeg waor, touwstumming gevraog. Moch geer toch meine rechte te höbbe op bepaolde oonderdeile op dees website, maak dit daan ezzebleef kinbaar bij :
tinyoetmestreech@xs4all.nl