Keuning de zawweleer dee góng
zien dochter zeuke zeuke.
Heer zeukde in ’t gans palies
vaan kelder tot de keuke.
Mer heer voont häör lekker neet!
Ze zaot op e weike,
Ze zaot op e weike,
Ze zaot op e weike, mèt André
’t Leedsje kump oet “Il Zawwelore” ‘ne klassieker vaan Giel vaan Lijf. Umstreeks 1962 woort “Il Zawwelore” opgeveurd door lierlinge en lierare vaan ’t Henric vaan Veldeke College. De milledie waor oet “Il Trovatore” vaan Verdi.
Belle Fabry heet m’ch de informatie aongelieverd.
dit is oet de Mestreechse Kemikken Opera vaan de HBS oet de sevetiger? jaore. De tekste zien vaan Guill. van Lijf, toen lierling vaan ’t VELDEKE. Iech zeuk ouch naor :” In e land….” oet dezellefden opera.
Daanke Belle veur dien aonvöllende informatie. iech gaon ins zeuke of nog örges “In e land” te vinde is!
Iech weet mèr twie zinnekes:
In e land, hei hiel wied vaandaon,
Waor ’n keuning.
(“keuning” hiel laank getrokke)
De keuning zien dochter zaot wel op ’t weike mèh met Servé, neet mèt André!!!
Met vaol plezeer voont iech den teks vaan Keuning de Zawweleer trok op eure site. Iech mein wel tot e paar opmerkinge op z’n plaots zien.
Iech hob tot 1958 op ‘t Veldeke gezete en iech weet zeker tot iech de ierste opvoering vaan Il Zawwelore op sjaol hob metgemaak. Dus dat zow daan in ‘56 of ‘57 moote zien gewees. Giel van Lijf zaot toen nog op sjaol , es iech mich neet vergis.
Weijer kin ‘t zien tot de dochter vaan de keuning get wispelturig waor en dus later op André is gevalle, meh miech steit bij tot ze met Serve op ‘t weike zaot.
Met daank veur de fantastische verzameling leedsjes,
Mat Smeets
Daanke veur eur sjoen aonvölling en veur ’t complimint.
Iech zaot vaan 1959 tot 1965 op het Veldeke en höb roond mien veerde lierjaor de ierste oetveuring vaan de Zawweleer metgemaak.
Giel van Lijf zaot toen op 5 HBS, deenk iech.
’T verhaol ging, dat heer de teks sjreef onder de teikenlessen.
1962 kin dus wel kloppe, 1958 neet, toen zaot ik nog neet ins op Veldeke en Giel woersjijnelek in de ierste klas.
En ’t waor inderdaod Servé, wat dee André daor moot, weet iech neet.
Iech huur noe, dat den ierste oetveuring toch in 1958 waor
Met absolute zekerheid kin iech zegke tot de ierste oetvoering vaan Il Zawwelore plaotsvoond in mei 1958 en wel in ut Derde Orde Gebouw in Mestreech.
De keuning gòng neet zien dochter zeuke, mer is zien dochter zeuke zeet d’n originele teks.
“In e land….” waor “t openingsleed vaan d’n opera Il Zawwelore, vrij naor Vapensiero vaan Nabucco.
De originele tekste zien nog besjikbaar.
Daanke veur de sjuste informatie, Theo! Iech gaon ’t aonpasse.
En inderdaad zaot de dochter vaan de keuning op ’t weike met Servé.