Op de koont vaan Hitler

Op de koont vaan Hitler zaot ’n dikke spin,
Drei kier um zie leukske de veerde kier d’r in.
Toen kaom Hitler aon de sjiet
en waor heer mètein zie spinneke kwiet.
Toen kaom heer aon de sjiet
en waor zie spinneke kwiet.

Dit is e leedsje oet d’n Twiede Wereldoorlog.

Bron: Marlies en Jo Biesmans

Geplaatst in Sjampleedsjes | 1 reactie

Miene maan heet nachsjiech

Dit leedsje weurt gezoonge door Ger Klingestein.

Miene maan heet nachsjiech
Iech slaop allein
De deur blijf ope
Tot half ein
Toen kaom ‘ne pelitie
Dee zag:”Juffrouw,
Diech mós ins wete
Wat iech vaan d’ch wouw”.
Jao zoe zien ‘rs miejer
Die dat speul wèlle höbbe
Mer iech begin dao neet aon
Daan mooste zien bij die dao
Miene maan is alles
En wat wèlste nog miejer
Dee krijg alles vaan miech
Dus niks veur diech!

Dit leedsje is sjijns gemaak door Anna Schoutese. Geer zeet Anna op onderstaond pleetsje.

Bron: Ger Klingestein

Geplaatst in Verhaolende leedsjes | Getagged | Een reactie plaatsen

Bij mien grameer op ’t stupke

Bij mien grameer op ’t stupke
zaot ’n eepke veur de deur.
’t Had e leukske in zie breukske
en ’t kós dao gaar neet veur.

En toen heet mien erm grameer
op die brook ‘ne lap gezat.
’t Eepke hoofde neet mie te beuke
’t Had toen zien leid gehad.

Och heer waor toch neet gelökkig,
Want heer voont ’t gaar neet leuk
boe mós heer noe oet plasse
doog ’t dèkser in zien brook.

“Bij mien grameer” weurt op 2 verjèllende milledieje gezoonge:
-op de wijs vaan ’t Duits volksleedsje: “Kommt ein vogerl geflogen”, wie veer dat zjus gehuurd höbbe
-op de wijs vaan ’t Russisch “Stenka Rasin,” vaan Isai Alexandrowitsj Dobrowen.

Wat de wäörd betröf, dao zien ech väöl variaties meh ’t ierste couplètsje is altied ’t zelfde: me zingk euver ’n eepke of e jungske. De variaties koume in de aander couplètsjes.

Op Lenculenhof zóng ’n mevrouw ’n oondäögende verzie:
Bij mien grameer op ’t stupke
zaot e jungske?’n eepke? veur de deur
Heer had e leukske in ze breukske
Mer heer kós dao gaar neet veur

Heer had e fluitsje boe heer op späölde
En al de kinderkes die lepen häöm nao
Heer staok zie stertsje in de huugde
Loer ins kinderkes wat höb iech dao.

Aander variatie:
Bij mien grameer op ’t stupke,
zaot ’n eepke veur de deur,
’t Had e leukske in zie breukske
en ’t kós dao gaar neet veur.

En ze pakde ziech e lepke
Wat ze zjus gevoonde had
En ze heet deen erme grummel
Veur dat look ‘ne lap geplak

Nog ’n variatie
Bij mien grameer op ’t stupke
zaot e jungske veur de deur
Heer had e leukske in ze breukske
Mer heer kós dao gaar neet veur

En toen kaome twie pelities
en die naome ’t jungkske mèt
en ’t jungkske begós te jenke
en zien grameer jenkde mèt.

Geplaatst in Kinderleedsjes | Getagged | 2 reacties

De drei sjoenste

2303_De_drei_sjoenste

 

    Gezoonge door Leny Willems

Es me later ins historie sjrijf
in de Nederlandse taol.
Weure veer behandeld in de lès
bij de broeders op de sjaol.
En daan zègke alle jonges:
“Bruiderlief we zijn zo braaf!
Nou vertel ons van de zwervers
Want dat heb u ons belaaf”.
En daan koume de verhaole
vaan drei zwervers, dat zien veer.
Die ziech vochte door ’t leve
zoonder sabel of geweer.
Es me eine soms get doen wèlt
krijg me ze vaan drei getoek!
Want de bolhoed, Flup en Keube,
zien drei han op eine boek!
Wat veer zègke is zjus,
meh ’t blijf oonder us
Jao de Bolhoed, Flup en Keube,
zien drei han op eine boek!

Flup de Koojstart, Ensinck de Kletskop en Pie de Bökkem waore 3 volkse tiepe in Mestreech. Ze woorte “De drei sjoenste” geneump. Dit dreital haolde allerlei fratse oet en waore in Mestreech bekind wie koed goud! Me kós ze dèks vinde op e benkske bij de Maosbrögk. Flup wèrkde op ’t slachhoes en had de geweente um, es ’n kooj neet door wouw loupe, aon häöre start te drejje, vendao ziene naom. Pie de Bökkem gong mèt hieringe en bökkeme langs de deur en Ensinck waor vreug kaal ……
Jacques Pirson heet in 1928 ‘ne kemikken opera euver dees drei figure gesjreve mèt meziek vaan Theodoor Fervers. ’t Stök had väöl sukses en is nog lang gespäöld gewore.
Iech voont nog ‘ne foto vaan Pie de Bökkem. Pie hètde eigelek Pieter Deyema en waor op 31 mei 1867 gebore aon de Vèssersmaos nómmer 3033. Vaan beroop waor heer oonder aandere brouwersknech, remplacant (heer góng veur ‘nen aandere tege betaoling es seldaot in deens), model bij de Kunsnijverheidssjaol. Meh ziene bijnaom kraog heer toch door achter ’n kaar mèt bökkeme te stoon.
Op de foto is heer 90 jaor en zaot op Calvarie. Sjo Smeets steit neve häöm. Op 91-jaorege leeftied is Pie gestorve.

2303A_Pie_de_Bökkum_Sjo_Smeets_carnaval_1950_Abtstraat2

Geplaatst in Leedsjes, Verhaolende leedsjes | Getagged | Een reactie plaatsen

Eus aajd Mestreech is ’n eerds perredies

Gezoonge door “De Ghesellen van de Sanck” alias “De zingende Pótsvrouwe”
Soliste: Corrie v.d. Heuvel-Herben en Frans Dizy

Eus aajd Mestreech is ’n eerds perredies
Boe kinste sjoener vinde?
Stei zoe wie Londe, Berlien en Paries
Kinne us neet verblinne.
De meidskes zien sjoen
en ’t beer smaak nao wien!
Wee zouw neet gere Mestreechteneer zien?
Eus aajd Mestreech is ’n eerds perredies
Leve de lekker wiever!

Mestreech ligk hiel kort bij ’t eerds perredies, wis geer dat?
Iech lègk ’t eve oet wie dat kump!
In Mestreech höbbe veer ’n Becanusstraot. Die is geneump nao Johannes Goropius Becanus.
Dat waor ‘ne bereumden humanistischen arts oet de 16e iew.
Eigelek hètde heer Jan Gerartsen van Gorp (ouch Jan van beek geneump) en waor op 23 juni 1519 gebore in Gorp bij Hilvarenbeek. In deen tied waor ’t mode um d’ne naom te vertaole in ’t Latien en dat doog heer dus ouch.
Becanus waor neet allein arts en filosoof, meh ouch taolfanaat. Heer spraok daan ouch de nudege taole. Wat häöm veural bezeg heel waor de vraog: “Wat veur taol woort gesproke in ’t eerds perredies?”
Volges Becanus mós dat ’n zier invojdege taol zien, ’n taol mèt väöl einlettergrepege wäörd. Heer dach die taol gevoonde te höbbe in ’t Diets (Nederlands), um gans zjus te zien, in ’t Vlaoms vaan de Antwerpenere. Volges häöm waor dàt de taol, die Adam en Eva gesproke hadde.
Wie koume veer daan, volges häöm, aon die aander taole? De Babylonische spraokverwarring bij ’t bouwe vaan d’n torie vaan Babel had de aander taole opgelieverd en die lui höbbe ziech denao euver d’n hiele wereld verspreid!
Eine vaan de naokaomelinge vaan Noach, Jafet, bleef de oersprunkeleke aw taol vaan Adam en Eva spreke (en zal dao dinkelek ouch zien blieve woene!).
Becanus meinde tot de Antwerpenere aofstammelinge vaan dee Jafet waore en daodoor spraoke de Antwerpenere ‘ne (verbasterde) vörm vaan de oertaol, de taol vaan Adam en Eva.
In 1569 heet heer hei-euver e book oetgegeve bij Christoffel Plantijn “Origines Antwerpianae”. Eigelek is d’n inhaajd verdeild euver 9 beuk die same miejer es 1000 paginaas besloon.
De conclusie die Becanus trok is: bij Antwerpe laog ’t eerds perredies!
In zienen tied had Johannes Goropius Becanus zeker aonhengers, meh ouch väöl lui die zien theorie volkoume oonzinneg voonte, bijveurbeeld euze bekinde Hugo de Groot.
Wat heet Johannes Goropius Becanus noe mèt Mestreech te make?
Eigelek neet zoe väöl. Heer waor Antwerpe oontvlöch (mesjiens vaanwege de godsdeens?) en woende in Luik. Meh umtot landvoogd graaf (aandere zègke hertog) Medina Coeli kraank waor en ziech door häöm wouw laote behandele woort heer nao Mestreech oontbooje. Dao woort Becanus zelf kraank en storf op zaoterdag 28 juni 1573 (sommege bronne zègke 1572). Zie graaf zouw ziech bevinde in de Aw Minnebreurekerk, althans d’n epitaaf.
Es geer uuch verbaas euver dit verhaol, kin iech uuch nog get sjoenders vertèlle! In de 18e iew maakde ‘ne gelierde ’t nog boonter: André Kempe beweerde tot God Zweeds spraok en Adam Deens! Meh…. let op, de slang (’t serpent zag heer) spraok Frans!
De plaots boe ’t perredies gelege heet weurt aanders ouch nog door e paar aander plaotse geclaimp o.a. örges in Tsjetsjenië. Iech voont e stökske in ’n gezèt oet 1998 boe-in de universiteit vaan Grozny beweerde tot Adam en Eva Tsjetsjeens gesproke hadde!
Nao dit verhaol bin iech eigelek hiel blij tot iech in Mestreech woen!
In ’n stad, die zoe kort bij ’t ( Antwerps ) Eerds Perredies ligk, moot me toch gelökkeg zien…….

2302_Johannes_Goropius_Becanus_klein                             Johannes Goropius Becanus

2302_Becanus_Origines_Antwerpianae_klein                 Oersprunkelek werk vaan Becanus

2302_Krantenartikel

Geplaatst in Leedsjes, Verhaolende leedsjes | Getagged | Een reactie plaatsen

De bidweg

Men hoort er soms zaken
die men nooit heeft gehoord
Onder anderen het voorstel
dat ik hier ga doen.
Het was een man van fatsoen
die ik zijn naam hier niet noem
Zijn vrouw ging op reis
om een bidweg te doen.
Het was een man van fatsoen
die ik zijn naam hier niet noem
Zijn vrouw ging op reis
om een bidweg te doen.

Toen zijn vrouw op reis was
toen kreeg hij een kuur
Maar geloof mij ,die grap
die betaalde hij duur
Hij kende een dame die er was op gesteld
om met heren te wandelen
maar meestal voor het geld.
En hij sprak:” Lieve Griet,
royaal ben ik zo gij ziet
en het geschreeuw van de kinderen
dat hindert ons niet
En hij sprak:” Lieve Griet,
royaal ben ik zo gij ziet
en het geschreeuw van de kinderen
dat hindert ons niet

Zij waren aan’t wandelen
en spraken geen woord
Want men is met zulke dame
Alleen dig? akkoord
En hij sprak per abuis
Kom ga je mee naar mijn huis
Wij zullen ons wel amuseren
mijn vrouw is niet thuis.
En hij sprak per abuis
Kom ga je mee naar mijn huis
Wij zullen ons wel amuseren
mijn vrouw is niet thuis.

De nacht was verdwenen
en de morgen brak aan
’t Wierd tijd dat die juffrouw
de deur uit moest gaan
Maar opeens viel haar oog
op een andere plaats?
waar ze mooie antieke
beelden zag staan
En ze dacht:”Pak maar mee,
ja zo een beeldje of twee,
ze hebben ook een waarde,
meneer is tevree.
En ze dacht:”Pak maar mee,
ja zo een beeldje of twee,
ze hebben ook een waarde,
meneer is tevree.

Maar toen meneer ontwaakte
miste hij er die zaak
en heeft zijn beklag aan
’t bureau van gedaan.
Men ging onderzoeken
en………?………
…………..?………
………….?……..
En hij antwoordde snel
jawel bij Griet in de Hel
Daar verkopen ze antieke,
versta je me wel
En hij antwoordde snel
jawel bij Griet in de Hel
Daar verkopen ze antieke,
versta je me wel

Als Gij wilt passeren
voor een man van fatsoen
moogde Gij met zulke dames
geen wandeling doen
En bidt je vrouw voor de vree,
ja bidt dan thuis voor de vree
Dan pakken ze je geld
en je beelden niet mee
En bidt je vrouw voor de vree,
ja bidt dan thuis voor de vree
Dan pakken ze je geld
en je beelden niet mee.

’t Leedsje is neet in ’t Mestreechs meh huurt in mien ouge toch tot de aw Mestreechse leedsjes! Wie geer höb kinne beluustere weurt de Helstraot drin geneump. Zoe hètde vreuger de Bernardusstraot. Die straot stoont toen bekind veur de “hoezer vaan plezeer”, bordele dus. ’t Is opgenome mèt ‘ne bandrecorder in de viefteger jaore vaan de veurege iew. De dame die ’t zingk waor in deen tied al in de tacheteg! Zie brach ’t ten gehure tijdens de wekelekse kaartmiddag bij häör naobers. Noe en daan wis ze d’n teks neet mie gans en neuriejde daan mer de milledie. Dao woort dèkser oonder ’t kaarte gezoonge en noe had de zoon des huizes ‘ne bandrecorder gekrege dee heer wouw oetperbere! En dit is ’t rizzeltaot …..

Geplaatst in Leedsjes, Verhaolende leedsjes | Getagged | Een reactie plaatsen

Sinte Berbke leef

Sinte Berbke leef,
gèf us nog get ezzebleef.
Sinte Berbke leef,
gèf us nog get ezzebleef.
Al is ’t daan mer peperkook
da’s good veur in eus oonderbrook!
Sinte Berbke leef,
gef us nog get ezzebleef.

Op de foto ‘ne reliekhawwer oet de sjatkamer vaan de Slevrouwe veurstèllend Sinte Berbke.
4 December is de feesdaag vaan Sinte Berbke oftewel De Heilege Barbara. Vreuger woort dat feestelek gevierd. De groete klok vaan de Sint Servaos woort gelojd en ’t waor ‘nen hoegtijdaag veur de Broedersjap vaan Sint Barbara. In de gezinne woort deen daag getrakteerd op “tartepomme” .
Meh, saoves brach Sinte Berbke e bezeuk aon de kinder. Die wiste neet beter of ’t waor de deensmaog (of de vrouw!!!) vaan Sinterklaos .

Geplaatst in Feesleedsjes, Leedsjes | Getagged | Een reactie plaatsen

De (k)toe

De toe die had ‘ne start
En wat deed die toe daarmee?
Kwispele, kwispele, kwispele in die weide (2x)
En kwispele al in die weide (2×)

En die toe en die had poete
En wat deed die toe daarmee?
Trippele, trippele, trippele in die weide (2x)
En trippele al in die weide (2x)

En die toe en die had ‘ne kop
En wat deed die toe daarmee?
Snuffele, snuffele, snuffele in die weide (2x)
En snuffele al in die weide (2x)

En die toe die had twie heurens
En wat deed die toe daarmee?
Stoete, stoete, stoete in die weide (2x)
En stoete al in die weide (2x)

En die toe die had twie ouge
En wat deed die toe daarmee?
Loere, loere, loere in die weide (2x)
En loere al in die weide (2x)

En die toe die had ‘nen uujer
En wat deed die toe daarmee?
Melke, melke, melke in die weide (2x )
En melke al in die weide (2x )

En die toe die had e vies gaat
En wat deed die toe daarmee?
Pruttele, pruttele, pruttele in die weide (2x)
En pruttele al in die weide (2x)

En die toe die had twie oere
En wat deed die toe daarmee?
Hure, hure, hure in die weide (2x)
En hure al in die weide (2x)

En die toe die had ’n moul
En wat deed die toe daarmee?
Vrete, vrete, vrete in die weide (2x)
En vrete al in die weide (2x)

En die toe die had ’n neus
En wat deed die toe daarmee?
Ruke, ruke, ruke in die weide (2x)
En ruke al in die weide (2x)

Op de foto zeet geer (pries)keuj in de Wieker Brögkstraot loupe. Die zien op weeg nao slachterij Sint Fiet op de Rechstraot. Tege de Paose woorte de bèste keuj geslach. De kiekoete vaan de slachters woorte prachteg verseerd en de lui keke ziech de ouge oet, zoeväöl sjoens waor d’r te zien.
Iech höb geinen daotum vaan de foto meh ’t zouw m’ch niks verbaze es dat neet vlak veur witten donderdag waor!

Trök nao ’t leedsje! Eint euver ’n kooj is weer ins get aanders!
Iech weit neet of dit leedsje algemein gekind waor in Mestreech meh bij de (bekinde) femilie Loontjens woort ’t gezoonge op de femiliereünies. De veurzenger zat in mèt ’n vraog en de res vaan de femilie gaof antwoord. Zoe te hure hadde ze altied väöl plezeer.
Wee ’t leedsje gemaak heet is neet bekind. Iech höb wel e vermoede. ’t Zouw wel ins eine vaan de bekinden tak vaan de femilie Loontjens kinne zien: Harie oet Mestreech, Harie oet Heerle, Theo ….. of nog miejer trök in de jaore, Hindrik Loontjens boevaan geer” ’t Sinterklaosleed” ouch hei kint beluustere.
Dees femilie heet ginneraties lang bekind gestande veur hun bijdrage ter verrieking vaan de Mestreechter zaank- en toneelcultuur.

Geplaatst in Feesleedsjes, Leedsjes | Getagged | Een reactie plaatsen

Tiritomba

Vermiesjellie, makkeronie, Mussolini
En veer goon nao Abessinie
En dao zalle veer de Negus ins liere
Wie de meidskes hei verkiere.
Tiritomba tiritomba
Tiritomba nero ole ole ole
Tiritomba tiritomba
Tiritomba all aria va!”

Wienie dit leedsje op de Negus vaan Abbessinië (Haile Selassie) en Mussolini gemaak is, is neet bekind.
In 1935 veel Mussolini Ethiopië binne en heel ’t land bezat tot 1941. Toen mingde Italië ziech in d’n 2e Wereld Oorlog door de kant vaan Hitler te keze. De Britse tróppe same mèt de Ethiopische vrijheidsstrijders verjaogde de Italjeenders, .
De milledie kump vaan ’t wereldberoemp leedsje “Tiritomba”. Joseph Schmidt waor de zenger dee hei mèt furore gemaak heet.
’t Mestreechs leedsje is eigelek zoe bitteke ’n Mestreechse ‘vertaoling’. Iech dink tot ’t gemaak is tösse 1935 en 1941, meh zeker is dat neet.

Wee geïntresseerd is in d’n originelen teks, hei kump ‘r:

Saragietta, saragietta la marina
Per trovare un amorata
Scianca rossa scianca rossa graziana
Perappropriaa pesciara
Tiritomba tiritomba
Tiritomba nero ole ole ole
Titritomba tiritomba
Tiritomba all aria va!

En Joseph Schmidt kint geer hei-oonder hure!

Geplaatst in Leedsjes, Sjampleedsjes | Getagged | Een reactie plaatsen

Gaank nao de merret Lieske, Lieske

Gaank nao de merret, Lieske, Lieske
Gaank nao de merret, Liezake
Wat moot iech op de merret doen Lambertie, Lambertie.
Wat moot iech op de merret doen, Lambertieke?

Koup diech ’n kooj, Lieske,Lieske
Koup diech ’n kooj, Liezake.
Boe moot iech die kooj goon zètte, Lambertie, Lambertie
Boe moot iech die kooj goon zètte, Lambertieke?

In de sjeur Lieske, Lieske
In de sjeur, Liezake
Die sjeur die is geslote Lambertie, Lambertie
Die sjeur die is geslote Lambertie, Lambertieke

Hool de sleutel, Lieske, Lieske
Hool de sleutel, Liezake.
Boe moot iech dee sleutel hole, Lambertie, Lambertie
Boe moot iech dee sleutel hole, Lambertieke?

Bij de smeed, Lieske, Lieske
Bij de smeed, Liezake.
Dee smeed dee zouw miech branne, Lambertie, Lambertie
Dee smeed dee zouw miech branne, Lambertieke

Bran ‘m tege, Lieske, Lieske
Bran ‘m tege, Lieske, Liezake
Boemèt moot iech häöm tegebranne, Lambertie, Lambertie
Boemèt moot iech häöm tegebranne, Lambertieke?

Mèt de lamp, Lieske, Lieske
Mèt de lamp, Liezake.
Boe moot iech die lamp goon hole, Lambertie, Lambertie
Boe moot iech die lamp goon hole, Lambertieke?

Op de zolder, Lieske, Lieske,
Op de zolder, Liezake.
Iech zouw d’n trap aofvalle, Lambertie, Lambertie
Iech zouw d’n trap aofvalle, Lambertieke

Breek de nek, Lieske, Lieske,
Breek de nek Liezake!

Geplaatst in Leedsjes | Getagged | Een reactie plaatsen