Veer zien de meidskes vaan ’t lomelefebrik

Veer zien de meidskes vaan ’t lomelefebrik,
Veer zien vaan èllestik
Veer zien vaan èllestik
Veer zien de meidskes vaan ’t lomelefebrik,
Veer zien vaan èllestik.

Veer zien de jonges vaan de blozerij
En pak die ganse negerij
En pak die ganse negerij
Veer zien de jonges vaan de blozerij
En pak die ganse negerij.

Weg mèt de jónges vaan ’t sigarefebrik
Die zien vaan èllestik
Die zien vaan èllestik
Weg mèt de jónges vaan ’t sigarefebrik
Die zien vaan èllestik.

Weg mèt de jónges vaan ’t patternaat
Die zien vaan sjòkkelaat
Die zien vaan sjòkkelaat
Weg mèt de jónges vaa ’t patternaat
Die zien vaan sjòkkelaat.

Veer zien de jonges vaan de Pieterstraot
Veer zien vaan iezerendraod
Veer zien vaan iezerendraod
Veer zien de jonges vaan de Pieterstraot
Veer zien vaan ie-ie-zerendraod.

Op de foto oet 1924 zeet geer de meidskes, die in deen tied wèrkde op ’t lomelefebrik. ’t Lomelefebrik bestoont toen 75 jaor. ‘t  Waor opgeriech in 1851 door L’Hoëst en Weustenraed.
Tot 1920 woort hei pepier vaan ketojne lomele gemaak. Die lomele móste gesorteerd weure op kwaliteit, denao in stökker gesnooje en gebleik.
Bij dat sortere kaom väöl stöp vrij en ’t waor daan ouch oongezoond werk. ’t Woort veurnaomelek gedoon door (jong) vrouwe. Meh, ’t in stökker snije vaan die lomele is tot 1874 gedoon door kinder! Nao 1874, wie ’t Kinderwètsje vaan Vaan Houten in wèrking trooj, mooste ze awwer zien es 12 jaor, daoveur telde de leeftied neet.
Wie iech al zag, ’t waor gei plezereg werk want ’t stöpde neet allein, ’t stoonk dao in die febrik ouch behuurlek: de liem, gebruuk bij de fabricage, woort gemaak vaan kneuk die in ‘ne ketel verwermp woorte. De gebruukde kneuk waore neet altied eve fris …….
Op ’t lomelefebrik hadde ze ouch ’n hermenie, wat noe de fanfaar “Kunst door oefening” is. Die kóste mer e paar marsje speule en es die oettrokke zagte de lui: “Dao bloze ze weer de negeteg-cent-marsj”.
Dat woort gezag umtot in die hermenie allemaol lede waore die op ’t febrik 90 cent of minder per daag verdeende. Wee dao ‘ne gölle verdeende veulde ziech te gruuts um lid te zien. Dee dach tot heer ‘nen hier waor.
Geer höb ’t leedsje zjus gehuurd mèt 5 couplètsjes achterein. Meh eigelek zien ’t gein 5 coupletsjes meh 5 apaarte leedsjes.

Leedsje 1 woort gezoonge door de meidskes vaan ’t lomelefebrik:

Veer zien de meidskes vaan ’t lomelefebrik,
Veer zien vaan èllestik
Veer zien vaan èllestik
Veer zien de meidskes vaan ’t lomelefebrik,
Veer zien vaan èllestik.

Leedsje 2 door de jonges vaan de glaasblozerij:

Veer zien de jonges vaan de blozerij
En pak die ganse negerij
En pak die ganse negerij
Veer zien de jonges vaan de blozerij
En pak die ganse negerij.

In leedsje 3 woorte de jonges vaan ’t sigarefebrik oetgesjolle tot ze niks weerd waore. Woersjijnelek umtot ze neet sterk hoofde te zien um die sigare te rolle.

Weg mèt de jonges vaan ’t sigarefebrik
Die zien vaan èllestik,
die zien vaan èllestik
Weg mèt de jonges vaan ’t sigarefebrik
Die zien vaan èllestik.

Leedsje 4 woort gezoonge door de meidskes vaan de roeje, de socialistiese meidskes, die niks mooste höbbe vaan de kathelieke jonges:

Weg mèt de jonges vaan ’t patternaat
Die zien vaan sjókkelaat
Die zien vaan sjókkelaat
Weg mèt de jonges vaan ’t patternaat
Die zien vaan sjókkelaat

Die kathelieke jonges gónge naomelek zoondags in de Begaorestraot nao ’t Patternaat (1889).
En aon d’n euverkant vaan de straot tegeneuver dat patternaat, laog ’t Vereinegingshoes vaan de socialiste.
’t Waor in d’n tied vaan de opkoms vaan ’t socialisme en de kathelieke en de roeje waor water en vuur.
Geer begrèp wel tot die meidskes dat leedsje gere zónge es ze zaoge tot e paar jonges dat patternaat wouwe ingoon.
De pestoer en de keplaon zörgde mèt activiteite in zoe patternaat tot de wèrkende jäög vaan 12 tot 17 jaor neet mèt de roeje in kontak kaom.
Ze lierde in ’t patternaat stiechteleke leedsjes zinge, biljarte, kaarte, keigele en ze woorte oonderriech in ’t kathelieke geluif. Ouch woort eder bijeinkoms aofgeslote mèt e gewetensoonderzeuk en ’n aovendgebed.
Wat frappant waor: es ze lid wouwe weure vaan ’n aander vereineging mooste ze goodkäöring vraoge aon de leiding vaan ’t patternaat.
Boe de geisteleke de jong lui mèt perbeerde te lokke waor: e belag broedsje, e glaas beer en ’n sigaar! Dat kraoge ze naomelek es ze de gansen tied dao bleve.
Regout en L’Hoëst vaan ’t lomelefebrik höbbe behuurlek get geld gegeve um die patternate te bekostige.

Leedsje 5 woort gezoonge door de jonges vaan de Pieterstraot. Die hadde ’t hiel dèks aon de stek mèt de jonges vaan de Raomstraot en ’t Grechsje! Bij die ruizings vloge de pötdèksele door de loch en veel nogal ins ‘ne gewónde.

Veer zien de jonges vaan de Pieterstraot
Veer zien vaan iezeren draod,
veer zien vaan iezeren draod
Veer zien de jonges vaan de Pieterstraot
Veer zien vaan iezeren draod.

‘Veer zien de jonges vaan de Pieterstraot’ heet nog ’n aander versie. De milledie is dao get aanders. Drop klikke um ’t te hure.

Dit bericht is geplaatst in Leedsjes, Sjampleedsjes met de tags . Bookmark de permalink.