Vief cent ’n oons viege

Vief cent ’n oons viege
Vief cent ’t oons
En bij Vlubet kinste ze kriege
En ze smèlte d’ch in d’ne moond
Wie (doeve)-doevestroont
En bij Vlubet kinste ze kriege
En ze smèlte d’ch in d’ne moond.

D’n oersprunk vaan de milledie vaan dit leedsje mote veer zeuke bij Brahms. Heer heet ‘n aajd studenteleedsje gebruuk in zien “Akademische Festouverture”. Brahms sjreef die, wie heer beneump woort es Doctor Honoris Causa aon de universiteit vaan Breslau.

Vlubet oet ‘t leedsje heet ech bestande!
’t Waor ‘n merretkoupvrouw die mèt kies en dit soort dinger op de merret stoont. Meh Broeder Ananias de Vries sprik euver e klein winkelke op d’n hook vaan de Klein Stokstraot en de Smeijstraot, boe zie häör spulle verkoch ….  Bij Vlubet kós me ouch geld liene! De rinte die dao-euver betaold mós weure sjeen boetegewoen hoeg te zien.
Bij dit aajd Mestreechs leedsje huurt e leuk verhaol.
’t Woort door de zengers vaan de “Mestreechter Staar” ins ‘ne kier de ganse nach door gezoonge (in fiesstumming), naotot ze d’n Exellentie-pries in de hoegste categorie gewónne hadde op e concours in Bergen/Mons in 1894.¹)
De Mestreechter Staar zóng in de “Section etrangère” (aofdeiling boeteland) en had dao sjijns gein aander concurente ….. dus ze wónne!
De ierlekheid gebeejd m’ch te zégke tot ze later op d’n daag in ‘n aander categorie toch nog wónne vaan e koer oet Mechele, ”L’Aurore” genaomp.²)

De lui oet Mons kóste de Mestreechsen teks vaan “Vief cent ’n oons viege”neet verstoon umtot ze dao Frans spreke. Eigelek maakde ’t niks oet, Hollands hadde ze ouch neet verstande.
Joseph Systermans (sjrijver en zakemaan) zeet hei-euver tot heer e tiedsje later in Mons kaom en dao te hure kraog tot ….…. de Mestreechtenere ziech zoe fatsojndelek geammeseerd hadde en zoe dèks ’t volksleedsje gezoonge hadde. Dat waore pas patriotte, die Mestreechtenere!
Toen Systermans tege dee mins zag tot heer ’t volksleed deen daag toch ech neet zoe dèks had hure zinge begós dee ’t leedsje vaan Vlubet te neurieje en zag: ” ’t Goons miech nog altied door m’ne kop”.
Systermans heet niks gezag mer heer dach achtereuver te valle vaan de lach.³)

Bronne :
¹) Sjarel Thewissen in “Eus eige leedsjes” bij de opmerkinge op blz 71
²) Artikel in ”De Nedermaas” oet 1923.

Dit bericht is geplaatst in Leedsjes met de tags . Bookmark de permalink.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *