Wee in jannewarie gebore is

Wee in jannewarie gebore is,
steit op.
Wee in jannewarie gebore is,
steit op.
Wee in jannewarie gebore is,
dee krijg vaan miech ’n gedachtenis.
Staank op, staank op, staank op.
Staank op, staank op, staank op.

Noe kump fibberwarie, miert en zoe wijer tot december

Wee noe nog neet gebore is,
steit op.
Wee noe nog neet gebore is,
steit op.
Wee noe nog neet gebore is
dee nump ze glaas al vaan d’n dis.
Drink oet, drink oet, drink oet.
Drink oet, drink oet, drink oet.

E leedsje dat väöl op fieste gezoonge woort. Me begós mèt jannewarie en vervolges kaome alle maonde aon de beurt, tot ederein rech stoont. Nao “december” zóng me ‘t lèste couplèt: “Wee noe nog neet gebore is”.
In ‘t book “Mestreechter vertèlsels” (oersprunkelek geheite “Prozawerken”) liet Olterdissen in ‘t verhaol “Volksbruiloft” Leen tege Munie zègke: “Alleh Munie, staank op, dalek dinke ze totste neet gebore bis!” Meh Munie verdomp ‘t en blijf zitte. Dat leit haos tot ‘ne veldslaag.

Väöl families höbbe veur hun fieste op dit leedsje ‘nen eige teks gemaak. E bitteke in d’n trant vaan ”Wee noe nog geine kletskop heet, steit op” of dao woort ‘t geboortejaor geneump um op te stoon.
“Wee in jannewarie gebore is” waor neet allein in Mestreech meh in gans Nederland bekind. Me zóng ’t in ’t eige dialek of in ’t Nederlands.
Noe de historie vaan dit leedsje! De oersprunkeleke wijs kaom vaan e Frans leedsje, dat weer gebruuk 
is veur ’n Oranjeleedsje. ’t Geit trök tot 1650!
Wat waor ‘t geval ? Ach daog nao d’n doed vaan ziene pa Stadhawwer Prins
 Willem II (6 November 1650) woort Stadhawwer Willem III gebore. Toen is dit leedsje gemaak.
 Me zóng in deen tied neet “Wee in jannewarie gebore is” mer

Al is ons Prinsje nog zoo kleyn —- hoezee !
Al evel sal ie stadhouder sijn —- hoezee !
En al is ons Prinsje nog so kleyn,
Al evel sal ‘t Oranje sijn !
Vivat Oranje! Hoezee.
Vivat Oranje! Hoezee.

‘t Waor in deen tied naomelek neet zeker of dee bebie oets ‘t amb vaan ziene pa, dus Stadhawwer,
 zouw bekleie gezeen de polletieke situatie.
Volges ‘t “Meertensinstituut”, dat ziech bezeg hèlt mèt ‘t vaslègke vaan eus taol en cultuur zien op
 dees wijs in de loup vaan d’n tied zoe’n 350 versjèllende tekste bekind gewore.
In 1813 bijveurbeeld, wie de Franse tróppe vaan Napoleóng weer oet eus land móste vertrèkke, 
zónge de lui op dees milledie:

Bonaparte is op de vlucht gegaan ——- hoezee!
Al met zijn twaalfhonderd man ——– hoezee!

Kinners ¹) vaan aw Nederlandse leedsjes meine tot ‘t woord “Hoezee” in de 18e iew vaanoet Pole via
 Ingeland in Nederland beland is. In Pole zagte ze naomelek “Hussa”. Oonderweeg veraanderde ‘t woord
vaan Hussa→Huzza→Huzzee→Houzee→ in …. Hoezee.
Diezelfde kinners zègke ouch tot ‘t leedsje oet 1650 oersprunkelek allein oet de 2 ierste regelkes bestoont! ²)

Bronne:
¹) In ‘t blaad “Den Navorser” deel X (1860) aongehaold door J. ter Gouw.
²) J. ter Gouw in “Volksvermaken” oet 1871

Dit bericht is geplaatst in Feesleedsjes, Leedsjes met de tags . Bookmark de permalink.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *