Adieu menier Pierre
Veer goon uuch noe verlaote
Veur vief-en-daartig cent
Goon veer nao de seldaote
Hoera viva
Veer goon nao Charleroi! 2×

Adieu menier Pierre
Veer laoten us neet loompe
Die vief-en-daartig cent
Versliete veer aon us kloompe
Plezeer, plezeer
Veer goon nao Sint Lambeer! 2×

Adieu Regout,
Veer goon uuch noe verlaote
Veer goon nao Charleroi
Mèt al eus kameraote
Hoera, viva
Veer goon nao Charleroi! 2×

Veer zien noe hei bijein
um us te ammesere
veer dinke aon gei sjagrein
meh altied aon plezeer
Hoera, viva
Veer goon nao Charleroi! 2×

Es veer us goon vermake
dat deit us hertsje leve
Daan zinge veer hoera
Hoera de Charleroi
Hoera, viva
Hoera de Charleroi! 2×

Aon vrije dinke veer neet
Dao zien v’r neet veur verlege
Veer goon nog liever nao Grien
en drinke e gleeske beer
Hoera, viva
Veer goon nao Charleroi! 2×

De hinne (haon) dee is geplök
De vere zien gevloge
Vaan hei tot aon de brögk
Ze zègke ’t is geloge
Bijein, bijein
Bij Krischer op nómmer ein! 2×

Op de foto zeet geer drei roondoves, die volgestapeld woorte mèt cassettes, gevöld mèt oongebakke eerdewèrk.

Op de febrik vaan Regout is dèks gestaak gewore! Soms mer veur e paar oor, meh dao zien ouch stakinge bekind vaan daog, weke, jao zelfs maonde!
In aprèl 1886 waor ’n staking vaan de glaasblozers. Dees staking heet mer e paar daog gedoord. ’t Gesjèl góng euver ’t verliege vaan de tarieve en dat woort neet gepik. Volges M. (Geel) Ubachs (in “Een eeuw modern kapitalisme”) woort ’t volgende door de stakers gezoonge op de wijs vaan e bestaond leedsje

Och nein Menhier Regout
Nog neet veur viefendaartig
Veer goeje de kan dao neer
Veer goon nao Sint Lambeer.
Och nein! Och nein!
Veer goon nao Sint Lambeer.

In 1896 bij ’n nui staking op ‘t febrik vaan Regoo (Regout) woort dit leedsje (sjijns) aongepas, dat wèlt zègke de ierste 2 couplètsjes.
De glaassliepers lagte ‘t wèrk in 1896 neer, neet allein veur de loensverlieginge meh ouch veur de arrogante meneer, boe-op zie behandeld woorte door de zäöns vaan de stiechter, Pierre Regout. De staking doorde 7 maond en zouw ‘ne ramp weure veur de Mestreechse arbeidersbeweging.
De patroens lete niks nao um de staking te breke. Ach oonderkroepers (werkwèllege) woorte gevoonde um zoe de staking te laote mislukke. En wie de cent vaan de stakingskas nao e tiedsje ouch op waore, kóste de wèrklui niks aanders doen es touwgeve.¹)
‘t Loen vaan ‘ne jonge wèrkmaan dee in de glaasblozerij wèrkde waor nog geine gölle per daag! ‘t Laog draon wieväöl ervaring heer had en wàt heer deeg. Heer begós met 40 cent per daag en es heer “derde gamin” gewore waor verdeende heer miejer.
Heer mós zoe’n 10 ore per daag wèrke.
D’n hier J. Robeers waor in 1887 glaasblozer en 48 jaor aajd. Heer zaot 37 jaor in ‘t vak en had zien hoegtepunt wat de kezjem betröf, bereik. D’n hier Robeers verdeende tösse de 33 en 35 gölle per 14 daog. Meh e loentuutsje mèt zoeväöl drin waor ‘n oetzundering.²)
‘n Vrouw op de sjèlderkamer verdeende 7 tot 9 gölle per 14 daog.³)
Trök nao d’n teks vaan ‘t leedsje!
Iech höb veur ’t gemaak mer alle miech bekinde tekste op dees milledie bijein gezat! Dat wèlt neet zègke tot dee gansen teks mèt al die couplètsjes ouch achterein gezoonge woort! De ierste 3 couplètsjes hure bij ’t stakingsleedsje, de volgende woorte bij aander gelegenhede gezoonge.
Eve get oetlègk:

“De hinne zien geplök, de vere zien gevloge” kin twie dinger beteikene:
-ze voolte ziech verneuk.
-‘t kin ouch wieze op ‘t aajd kèrmesgebruuk vaan “den haon sloon”. Veur oetlègk hei-euver kiek in leedsje “Mèt kèrmes” (klikke)

In ei coupletsje weurt gezoonge euver “Grien”. Dat waor ’n slieterij op de Boschstraot boe me ziech ouch eine kós drinke. Dee mins hètde “Grein” meh in Mestreech woort “Grien” gezag. Miestal bleef ’t neet bij ei dröpke en belande ’t groetste deil vaan de kezjem in de tes vaan Grien of ‘nen aandere hospes.

In d’n teks steit wijer tot ze nog liever seldaot woorte of nao Charleroi of ‘t kristalfebrik Val Saint Lambert in Luik zouwe goon!
Dao waor ‘t, nao ‘t sjijnt, get beter geregeld veur de wèrklui umtot de Waolse wèrklui neet alles pikde vaan de patroens.

In ’t lèste couplètsje huurt geer “Bij Krischer op nómmer 1”. Krischer waor ‘nen danszaol gelege op de Bleikerij nómmer 1.

Bronne :
Verzet arbeiders (Limburgs museum)
¹) “Een kwart eeuw van strijd” door G.H.Pieters vaanaof blz. 132
²) ‘t Verhuur vaan J.Robeers in de “Parlementaire Enquete” vaan 1887 blz.178 en 179 oet ‘t book “Een kwaad leven” deel 2 Maastricht vaan Jacques Gielen.)
³) ‘t Verhuur vaan H.J.Hollands in de “Parlementaire Enquete” vaan 1887 blz 236 oet ‘t book “Een kwaad leven” deel 2 Maastricht vaan Jacques Gielen.