Bij Lies Bosch al in dee groete zaol,
Dao is nog plaots veur us allemaol
Meh neet allein veur de groete lui
Dao zien versjeie blozers bij
Viva d’n ölger, viva d’n ölger,
Viva den ölger vaan Lies Bosch
Viva den ölger, viva den ölger
Viva den ölger al vaan Lies Bosch

Es me ’t had euver ‘Bij Lies Bosch” woort ‘nen danszaol/kaffee bedoeld. Dee laog in de buurt vaan de Herbenusstraot en de Staotesingel, zègk mer Hoeg Fraankriek. Later is heer vaan naom veranderd en woort ’t “D’n Téméraire”.Later is dee kaffee vaan noam veranderd en woort ’t “D’n Téméraire”(De vermetele). ’t Waor ‘nen dèftige Cafe chantant aon wat noe de Herbenusstraot is (in 1903 zoe verneump). Eigeneer waor Baron de Biberstein. Nog later koch de Momus ’t pand en opende in 1890 ’t aajd mennekeshoes.
Dit is neet ’t einege leedsje boe “Bij Lies Bosch” in veurkump. In ’t leedsje “Zoondagsaoves nao tien ore” weurt ouch gezoonge euver Lies Bosch.

Ouch leuk um te weite is tot es vreuger woort aongekondeg “groet orkes” daan wis ederein tot eine op ‘nen örgel späölde. Spraok me euver “klein orkes” daan zaot dao ‘ne monekaspeuler.
Mestreech had vreuger väöl danszaole:

Desjattoo,
Achter de Barakke. D’n eigeneer hètde Pie Lardinoy. Heer waor getrouwd mèt e meidske vaan Duchateau. In ’t Mestreechs is dat verbasterd tot Desjattoo. Geine zag :”Veer goon danse bij Pie Lardinoy”, ederein had ’t euver danse bij Desjattoo”. Me gebruukde dus de naom vaan zien vrouw.
D’n ölger vaan die zaak waor geweldig groet en gaof e flink geluid. De meziek waor boete zoe good te hure, tot hiel get lui neet allein binne meh ouch op de stóp dansde. Dat waor hiel gemekelek veur es d’n cent op waore!
Miene pa vertèlde wel ‘ns tot heer vreuger góng danse bij “Desjattoo”. Iech höb m’ch jaore aofgevraog boe dee naom vaandan kaom en boe die zaak daan wel gelege moch höbbe. Jaomergenóg kós iech ’t häöm toen neet mie vraoge. Meh e tiedsje geleie voont iech ’t antwoord in ’n aw gezèt.

Merieke Franse
nao ’t sjijnt op de Kommel. Dao is ouch e leedsje vaan. ”Hop hop hop, de Kommel op, bij Merieke Franse kinste lekker danse”.

De Grand Salon
in de Grachstraot. D’n eigeneer waos de Rutten vaan “De Zwart Ruiter”, ’n bekinde brouwerij op de Annalaon. Vaan de “Grand Salon” weite v’r tot Wöllem Vliegen en G.H. Pieters, twie veurvechters vaan ’t socialisme, dee zaol ‘ns geheurd hadde vaan ‘ne zètbaas um ’n vergadering te hawwe. Dat waor op ‘ne zoondagmiddag in jannewarie 1890. Ze betaolde ’t boetegewoen hoeg bedraag vaan 20 gölde heur veur die paar ore. D’n eigeneer vaan de “Grand Salon”, Rutten vaan brouwerij “De Zwarte Ruiter”, wouw eigelek neet höbbe tot socialiste (roeje!) dao vergaderde en heel de deure geslote tot de geheurden tied verstreke waor. Toen heet Vliegen de vergadering mer in zien hoeskamer gehawwe. De meubele waore opzij gezat en de lui stoonte wie hieringe in ’n ton in zien woenkamer.
D’n daag denao zag d’n hoesbaas Vliegen de heur op vaanwege die vergadering.
Rutten koos eier veur zie geld! Heer leet ’t neet aonkaome op e perces meh betaolde de heursom en alle oonkoste, die gemaak waore, trök.
’t Leuke waor tot Vliegen e manifes drökde euver ’t ‘sjendaol’, tot op zoe’n meneer vergaderinge oonmeugelek gemaak woorte. Heer leet dat in doezendtalle verspreie in Mestreech, allemaol op koste vaan Rutten.1)

De Vloere Pisbak
op de Boschstraot. Woersjijnelek hètde dee zoe vaanwege de groete pisbak, urinoir, dee veur de Sint Matheiskèrk stoont. De Boschstraot waor in deen tied vergeve vaan de kaffees. D’r laoge ‘rs mer leefs 28, dus dee pisbak waos ech wel nudeg. In 1889 waore hei in gans Mestreech 488 kaffees op ’n inwoenersaontal vaan 31.778. Dat is eine kaffee veur eder 63 inwoeners, bebies en aw lui mètgerekend.

De Boerendans
aon Abrahamslook

’t Knep(b)ke
op de Minnebreureberg

Bij de Beul (dat waor z’ne bijnaom) meh dat waor mie ‘ne “café chantant” 2)

Bij Krischer Nómmer 1
“Krischer nómmer 1” oet ‘t leedsje laog op de Bleikerij nómmer 1 en waor ‘nen hiel bekinden danszaol. Me kós ‘m bereike via ‘ne boetentrap. Dao kaome sjijns väöl piotte en ’t góng get wèller draon touw es bij ‘t deftige “Sjeepe Dolhain”, dat ouch op de Bleikerij laog. Later heet de “Keuringsdienst voor Waren” e gebouw neergezat op de plaots, boe “Krischer nómmer 1” gestande heet. Es aondinke aon d’n danszaol veurzaog me ‘t gebouw vaan ‘ne boetentrap. Jaomergenóg is ouch dat gebouw verdwene.
Op de Bleikerij stoont wijer ‘nen houte frietkraom vaan ‘n dikke medam. Heer waor allein op zoondag ope. ‘n Tuut friet kosde twie cent es de friet boete woorte opgegete. Binne kraogste e ruuske friet op ‘nen teleur veur vief cent. Mèt kèrmes stoont diezelfde medam mèt häöre frietkraom tegeneuver Minckeleers.
Wie iech aon dees informatie kom? Ze heet gestande in de rubriek ”Maaskanttekeningen” in de gezèt gesjreve door Fons van Hees(?) 3).

Sjeepe Dolhain
op de Bleikerij. Dat waor ‘nen danszaol, gecombineerd mèt ‘ne kolenhandel!

Tenslotte laog veur deftege lui in ’t park ‘ne plancher. Dao stoont in ’t midde ‘ne groete, kopere waterketel. De Hollandse femilies brachte ziech d’n thee mèt. Ze bestèlde z’ch ’t kokend water of ze sjikde e keend mèt d’n theepot nao ’t kräönsje um heit water te hole. Mestreechtenere, die dao wel ins gónge kieke nao al die deftegheid repe, es ze dat zaoge, vaanaof ’t hek:”Veur miech ‘nen teleur gajem mèt ’n versjèt.”2) Veur de lui die neet mie weite wat gajem is: wasem of damp.

D’n Huijwagel
Dee laog in de Sint Theunisstraot. Dao is ‘ne foto vaan oet 1936. Dee kint geer hei-oonder bekieke.

Wijer waore d’r nog de boetelokale vaan de börgersociëteite, oonder aandere “Apollo” en “Polyhymnia”.

Bronne:
1) G.H.Pieters “Een kwart eeuw van strijd” blz.39 en 40
2) Alfons Olterdissen “Prozawerken” blz 33
3) Oetgeknipde stökskes oet gezètte boe geinen daotum bijstoont.