Op de Merret stoont e huiske
In ’t midde gans allein.
Iezere plate mèt e deekske
En vaan binne twie blauw stein.

Aon de veuj laog dèks ’n huipke
Wat dao neet waor ingewejd.
Meh door eine dee neet wachde
Stiekemkes deneergedrejd.

En de loch waor neet te ruke
Nein ! die waor neet altied veers
Zeker neet es zjus e mooswief
Dao zoeget had neergepeers.

Meh noe weurd ’t aofgebroke
En me weurd ’t huiske kwiet.
Oondergroonds goon ze ’t make
Nao de eise vaan d’n tied.

En de kaffees vaan de Merret
Höbbe vreiselek ’t land!
Veur e dröpke góng me pisse
In de Ruiter of bij Brand.

En de zaak zal defteg weure
Urinoire mèt closèt.
Wel kos ’t verdomp väöl duite
Laos iech lèts in de gezèt.

Al dat geld vaan eus belasting
B en W tot euze spiet
Höbbe veer Mestreechtenere
Noondedju daan zoeväöl sjiet?

Refrein: Litsem lotsem fallederieje
Litsem lotsem falledera
Iez’re plate mèt ’n deekske
En vaan binne twie blauw stein.

In Mestreech stoonte vreuger hiel get openbaar urinoirs. De manne woorte good bedeild en de dames móste mer zien wat ze in tied vaan hoege noed doge! Dinkelek vlöchde ze ‘ne kaffee in!
Op de Merret aon ’t begin vaan de Boschstraot, stoont vreuger ‘ne “pisbak” (zoe geneump in de volksmoond ) dee de vörm had vaan ‘ne kröl. Dat woort ouch zoe gezag: de Kröl. Zoe’ne groete urinoir waor nudeg aongezeen ’t aonzeenlek aontal kaffees op de Boschstraot …..
Wie me ’t standbeeld vaan Minckelers heet opgeriech in 1904 woort dat groet geval vervaange door e kleiner exemplaar. In 1927 is dat sjijns weer vervaange door ‘nen aandere en dao is e leedsje op gemaak door Pol Chambille de Beaumont. De milledie kaom vaan ’n hiel aajd leedsje: “Litsum, litsum fallederie”, wat dèkser door Mestreechtenere es wijs veur e leedsje gebruuk woort.
Wèlt geer weite boe vreuger euveral ‘ne pisbak gestande heet?
Bij de statie, ’t Bat, de Kesselskade, de Toongersestraot, de Boschstraot/Besing, ’t Cörversplein, bij de Keuningskapel vaan de Sint Servaos, op de Luregrach, d’n Hertogsingel/Calvariestraot, de Helmstraot, achter ’t Stadhoes (dat waor oondergroonds), op ’t Emmaplein, op de Fraankestraot/Keuningsplein, op de Hoeg Brögkstraot, de Bieseweeg en ‘t  Cannerplein.

Bron vaan de pisbakke: Jef Bastiaens oet ’t “Mestreechs Printebook” (rubriek in De Limburger)