Es geer nao Sint Pieter gaot
Daan moot geer uuch neet versjrikke.
Ze goeje uuch mèt stein
De mieste (ge)paord mèt brikke.
Bijein, bijein,
Bij Krischer op nómmer ein. (2 kier)

“Krischer nómmer 1” oet ‘t leedsje laog op de Bleikerij, hoesnómmer 1. ’t Waor ‘nen hiel bekinden danszaol. Me kós ‘m bereike via ‘ne boetentrap. Dao kaome sjijns väöl piotte en ’t góng get wèller draon touw es bij ‘t deftige “Sjeepe Dolhain”, dat ouch op de Bleikerij laog. Later heet de ‘Keuringsdienst voor Waren’ e gebouw neergezat op de plaots, boe “Krischer nómmer 1” gestande heet. Es aondinke aon d’n danszaol kraog ‘t gebouw ‘ne boetentrap. Jaomergenóg is ouch dat gebouw verdwene.
Op de Bleikerij stoont wijer ‘nen houte frietkraom mèt ‘n dikke medam die de friet maakde . Zie waor allein op zoondag ope.
‘n Tuut friet kosde twie cent es de friet boete woorte opgegete. Binne kraogste e ruuske friet op ‘nen teleur veur vief cent.
Mèt kèrmis stoont diezelfde medam mèt häöre frietkraom tegeneuver Minckeleers.

Bron:
“Maaskanttekeningen” dat waor jaore geleie ’n rubriek in de gezèt, dinkelek gesjreve door Fons vaan Hees.