Iech zit hei op de hei

Iech zit hei op de hei
Geine cent mie op m’n prij
Wat moot iech noe toch goon beginne?
M’ne jas dee is kepot
Gein brook mie aon mien vot
Dao moot iech ouch get op verzinne.

Refr.
Kaan niemand miech vertèlle
Boe de lui hun belasting kwiet wèlle zien?
Iech zouw die cent wel wèlle
En al waos ’t ’n ton of tien.

’t Vak dat geit zoe slech
Wee wèlt miech nog es knech
Iech loup ’t vuur miech oet de sjene.
Wie kom iech aon mien heur
’t Lapleer is zoe deur
Mèt lappe vèlt niks te verdene.

Vraog iech al in mie vak
Vief cent veur einen hak
Daan reup me:”Vogt wat biste sjerp!”
Iech win neet mie me broed,
D’n aofguns is te groet
Iech bin zoe flaw wie ‘ne kerp.

Dit leedsje kump oet ” De Kaptein vaan Köpenick” vaan Fons en Gus Olterdissen. Dee kemikken opera woort veur d’n ierste kier opgeveurd op 1 aprèl 1907. Heer woort gemaak nao aonleiing vaan ’n woer gebäörde historie.
Sjeunmeker Wilhelm Voigt, ‘nen halve crimineel, köp ziech e militair pekske en deit ’t ziech aon. Heer gebeejt 9 seldaote en ‘ne sergeant, die heer tegekump, mèt häöm te goon nao ’t stadhoes. Dao liet heer de börgemeister en ’t hoof vaan de peliesie arrestere wegens fraude en heer geit detössenoet mèt ’t aonwezege geld, miejer es 40000 reichsmark.
Heer heet dao gevaangenisstraof veur gekrege! Nao ’t oetzitte vaan die straof góng heer op tournee en sloog geld oet dees gebäörtenis. Heer deilde handteikeninge oet en góng mèt d’ch op de foto. Neet veur niks netuurlek.
Wilhelm Voigt is ouch in Mestreech gewees um handteikeninge oet te deile en euver zien strapatse te vertèlle.
In de Groete Staat, boe vreuger Cinema Royal (geopend in 1913) laog en noe ’t “Kruidvat” waor ’n horecagelegenheid, “In de Bodega”geheite. Dao kóste de Mestreechtenere ‘m zien en mochste, este betaoldes, mèt ‘m op de foto. (Sjarel Thewissen zaoleger had zoe’ne foto mèt handteikening). In de kemikken opera vaan de gebreurs Olterdissen zingk sjeunmeker Voigt dit leedsje.
Hei-oonder zeet geer ‘ne foto vaan de ierste opveuring vaan “De kaptein vaan Köpenick”. Gus Olterdissen zeet geer zitte op ’t beklaogdebenkske.