Noets geine pottemaan,
Noets geine blozer
Eine oet d’n ove weurt miene maan.
Bolle-bolle-bolle-biemba (3 kier)
Biemba-ja-ja.

In de sjouwbörg vaan Mestreech woorte geregeld opera-oetveuringe gegeve. De Mestreechtenere waore hiel bekind mèt populair ariaas oet die operaas. Dat kaom, umtot veer hei regelmaotig operagezèlsjappe nao touw haolde, die altied ‘t zelfde rippertoir hadde. Miestal waore dat boetelenders oet Luik, Namur, Verviers of Aoke. De artieste droge volges Olterdissen allemaol Italiaonse naome, zelfs es ’ne Mestreechse zenger mètdoog kraog heer achter ziene naom ‘n a of ‘n i geplak.
Wie Mestreechtenere zien, zie pasde d’n tekst vaan d’n opera aon in ‘t Mestreechs. ’t Kaom geregeld veur tot bij ’n oetveuring dee Mestreechter teks hèlop woort mètgezoonge. Olterdissen vertelt heieuver in zie book “Prozawerken”.
Heer gief ouch aon tot seldaote oet de plaotseleke kazern dèks mètdoge es figurante: es seldaote nudeg waore in ‘nen opera marsjeerden ‘rs zoe stök of 10, oonder leiing vaan ‘ne sergeant, um 7 oor de kazern oet nao de Kemedie. Op de buun woorte ze, op d’n achtergroond, links-um en rechs-um gecommandeerd en mochte daan weer aofmarsjere. Daomèt verdeende zie ziech 50 cent!

“Noets geine pottemaan” steit bekind es ’t leedsje vaan de febriksmeidskes. ’t Is ‘nen aria oet “Rigoletto”, -La donna è mobile, qual piùma al vento-. Op dees milledie zinge Mestreechtenere ouch “Mien meer heet sop gekook, zeve daog vaan eine knook”.
Tot ’t keend oet ‘t leedsje ”Noets geine pottemaan” eine vaan d’n ove wèlt höbbe, heet zien reie! Manne, die in de febrik vaan Regout aon de oves wèrkde waore forse sterke kerels. Zie móste de oves in en oetruime en zwoer lufte. ‘ne Pottemaan (eerdewèrker) kraog dèks de zoe gevreisde pottemennekes-krenkde, stöplonge. Ze woorte miestal neet aajd. En ‘ne blozer ouch neet. De gemiddelde leeftied in de 19e iew waor 40 jaor, mer pottemennekes, blozers en sliepers haolde dat bij lange nao neet. Die storve väöl vreuger.
Wèrke in de oves waor ouch neet zoe gezoond! Um brandstof en tied te spaore móste de ovewèrkers oves in, die eigelek nog väöl te heit waore. Ze kóste neet langer es 5 menute drin blieve en móste hunne kop mèt (nate)deuk umwindele. Dèks kaome ze droet mèt versnèrkde ougsbraoje en plumpe. Dao woort wel ins gezag, tot menier Pierre Regout (neet te verwissele mèt d’n awwen hier Petrus Regout) neet draon dach um zienen hoond of zie peerd in die heite oves te laote goon. Meh vaan ‘ne wèrkmaan verwachde heer dat wel! Dee woort röstig drin gejaog en oontslage es heer weigerde.¹) ²)
Geel Ubachs heet e verhaol opgeteikend vaan ‘nen ovewerker, dee door Louis Regout veur straof d’n heiten ove in woort gejaog um ‘ne losgegaange brik weer vas te zètte. De maan wees drop tot dat in zoe’n hitte neet te doen waor. “Niks mèt te make” zag Regout ” zèt dee brik weer drin”. “Meh menier Regout, dat kin m’nen doed beteikene” zag de mins. “Kin m’ch niks sjele, diech plaots dee brik drin of ………, de höbs de käös!”
“Good, iech zal ’t doen, menier Regout” zag de mins. “Meh veer zien alletwie katheliek, geer zalt m’ch wel touwstoon tot iech daan iers gaon beechte” en heer leep eweg!
Regout waor euvertrouf!

Bronne:
¹) “Een eeuw modern kapitalisme” Geel Ubachs blz.64
²) “Roomsche kinine tegen roode koorts” Jos Perry blz 54. Oetspraok vaan d’n hier M. Everaerts, dee in de “Parlementaire Enquete” oet 1887 heet getuig.