Heer kaom aon de statie
Zie geziech woort vuurroed.
Is dat noe Mestreech
Iech sjaom m’ch hei doed!
Ze verkoupe de koffie
Weet iech wat allemaol.
Dee zwarthandel vin iech
e reuze sjendaol!

Heer kaom op de Merret
Bij Minckeleers terech.
Opins löp ’n vrouw dao
ach hiel hel eweg.
Ze vluchde, ocherm
’t waor zjus ’nen haos.
Ze zaot dao te pisse en
Dao kaom Sinterklaos!

Heer kaom op de Boschstraot
’ne pliesie hèlt ’m aon.
Dee zeet: “Stap ins aof
Of iech lap uuch hei d’raon.
Laot m’ch eur persoenbewies
Ins kieke, hiel braaf!
Hei loupe ’rs zoeväöl
Aon twievieftig per daag!”

Heer ging door de Smeistraot
Wee had dat gedach.
Dao stoont Bet d’n Daanjel
Ze had ’m verwach.
Ze stoont dao te sjriewe
Met ’n mojl wie ’nen haos
Laot miech get verdene
Aoch gooje Sinterklaos.

Heer kaom op de Vriethof
En dach: “Wel verdrejd!
Iech geluif tot hei zeker
Get is weggewejd”.
Heer dach: “Wie geliek
Is hei alles mèt stein.
Tot ’t kiöske eweg is
Dat vin iech gemein!”

Heer ging nao de eendsjes
Aon d’n eendegrach,
Die dege hun möts aof,
Ze hadden ’m verwach.
Dao struide heer mais
en ouch lekkernij.
’n Eendsje dat reep:
“Get spikkelatie debij”.

Heer kaom aon de herte
Aon in ’t Hertekamp
Dao laog ouch e köppelke
Jao woer, hand in hand.
Heer dach: “Potverdikke
M’nen tied is neet groet,
Want aanders daan loerde
Iech hun lekker oet!”

Heer kaom bij de bere
Aon de berekojl
D’n aajdste vaan de bere
Trok ’n lieleke mojl.
D’n aandere dee zeet: “Jao,
Veer höbbe ’t neet koed,
Meh rijt us ’n dambord
Veer vervele us hei doed”.

Heer kaom aon de Philips,
’t touwbaksfebrik.
Wat heet heer zich dao
Toen ’n heudje versjrik!
’t Blauwdörp gans plat
En heer reep toen vol vuur:
“Is dat noe besjaoving,
Is dat noe cultuur?”

Toen is heer gegaange
Nao Spaanje trök
Wie-t geer allemaol wèt
’t is ’n aordeg stök.
Wie iech vroog: “Höb g’r olie?”
Toen zag heer gerös:
“Miene stoomboot heet ‘n kachel
Sjus wie de otobös”.

“Sinterklaos in Mestreech” is e sjampleedsje oet d’n Twiede Wereldoorlog, boe-in mèt väöl dinger d’n draak gestoke weurt. De wijs is dezelfde es “Zie ginds komt de stoomboot”.Nao mien informatie is ’t in 1942 gemaak en woort ’t gezoonge door Sjo Smeets. Sjo zal ’t ouch wel gemaak höbbe want heer zóng zien eige leedsjes en heer heet Mestreech hiel get leedsjes naogelaote.