Joonkmans laot uuch neet joonk trouwe,
al eur plezeer is daan eweg.
Geer zalt ’t uuch altied berouwe,
in plaots vaan good geit alles slech.
Want die vrouwlui, dat zien ratte,
slange zelfs vol venijn.
Zie zien zoe vals wie katte,
want dat zeen iech aon de mijn!

Sjotelsplakke en plakplaosters,
zien de vrouwlui in ’t hoes!
En daobij ouch nog langslaopsters,
ze dene tot chagrijn in de plaots vaan troes.
Och, ze kinne gaar neet zwiege,
este hun get touwvertrouws!
En dee zoe ein zal kriege,
dee wèt drommels good boeveur

Modepóppe op de straote,
kanarieveugel in d’n ougesjien.
En ze huppele op de maote,
ze keke luid en rope fien.
Och, ze kinne gaaroet neet zwiege,
eeksters zien ’t aon de deur.
Meh dee zoe-ein zal kriege,
dee wèt drommels good boeveur!

Wèlt geer zoondags ins goon drinke,
nao Sint Pieter of nao Biesland.
En geer höb aon niks te dinke,
trèk geer oet nao d’n aandere kant.
In d’n trouw moot geer ’t laote,
leve wie in d’n awwen tied.
Wèlt liever ’t trouwe laote,
roop: “Vivat de liberteit!”

Wee ‘t gesjreve heet is neet bekind. Iech höb ‘t gevoonde in ‘nen awwe, mèt de hand gesjreve leedsjeskajee. Oonderaon de bladzij, behurende bij dit leedsje stoont ‘n opmerking:

Zier sjoen milledie. Jaomer, d’n teks is zier sarcasties en spottend euver de vrouwlui.

In ‘t veerde couplètsje weurt gesproke euver “ziech eine drinke op Sint Pieter”. Väöl lui gónge nao Sint Pieter um ins lekker te kinne doordrinke! Dao waor e dröpke of e gleeske beer naomelek goojekouper es in Mestreech! Sint Pieter waor ‘n zelfstandige gemeinte en de accijnze op alkohol laoge lieger.
Dat heet gedoord tot 1920 want toen woort Sint Pieter door Mestreech geannexeerd en hoofde me um die reie neet mie denao touw te goon!