Eus aajd Mestreech is ’n eerds perredies

Gezoonge door “De Ghesellen van de Sanck” alias “De zingende Pótsvrouwe”
Soliste: Corrie v.d. Heuvel-Herben en Frans Dizy

Eus aajd Mestreech is ’n eerds perredies
Boe kinste sjoener vinde?
Stei zoe wie Londe, Berlien en Paries
Kinne us neet verblinne.
De meidskes zien sjoen
en ’t beer smaak nao wien!
Wee zouw neet gere Mestreechteneer zien?
Eus aajd Mestreech is ’n eerds perredies
Leve de lekker wiever!

Mestreech ligk hiel kort bij ’t eerds perredies, wis geer dat?
Iech lègk ’t eve oet wie dat kump!
In Mestreech höbbe veer ’n Becanusstraot. Die is geneump nao Johannes Goropius Becanus.
Dat waor ‘ne bereumden humanistischen dokter oet de 16e iew.
Eigelek hètde heer Jan Gerartsen van Gorp (ouch Jan van beek geneump) en waor op 23 juni 1519 gebore in Gorp bij Hilvarenbeek. In deen tied waor ’t mode um d’ne naom te vertaole in ’t Latien en dat doog heer dus ouch.
Becanus waor neet allein dokter en filosoof, meh ouch taolfanaat. Heer spraok daan ouch de nudege taole. Wat häöm veural bezeg heel waor de vraog: “Wat veur taol woort gesproke in ’t eerds perredies?”
Volges Becanus mós dat ’n zier invojdege taol zien, ’n taol mèt väöl einlettergrepege wäörd. Heer dach die taol gevoonde te höbbe in ’t Diets (Nederlands), um gans zjus te zien, in ’t Vlaoms vaan de Antwerpenere. Volges häöm waor dàt de taol, die Adam en Eva gesproke hadde.
Wie koume veer daan, volges häöm, aon die aander taole? De Babylonische spraokverwarring bij ’t bouwe vaan d’n torie vaan Babel had de aander taole opgelieverd en die lui höbbe ziech denao euver d’n hiele wereld verspreid!
Eine vaan de naokaomelinge vaan Noach, Jafet, bleef de oersprunkeleke aw taol vaan Adam en Eva spreke (en zal dao dinkelek ouch zien blieve woene!).
Becanus meinde tot de Antwerpenere aofstammelinge vaan dee Jafet waore en daodoor spraoke de Antwerpenere ‘ne (verbasterde) vörm vaan de oertaol, de taol vaan Adam en Eva.
In 1569 heet heer hei-euver e book oetgegeve bij Christoffel Plantijn “Origines Antwerpianae”. Eigelek is d’n inhaajd verdeild euver 9 beuk die same miejer es 1000 paginaas besloon.
De conclusie die Becanus trok is: bij Antwerpe laog ’t eerds perredies!
In zienen tied had Johannes Goropius Becanus zeker aonhengers, meh ouch väöl lui die zien theorie volkoume oonzinneg voonte, bijveurbeeld euze bekinde Hugo de Groot.
Wat heet Johannes Goropius Becanus noe mèt Mestreech te make?
Eigelek neet zoe väöl. Heer waor Antwerpe oontvlöch (mesjiens vaanwege de godsdeens?) en woende in Luik. Meh umtot landvoogd graaf (aandere zègke hertog) Medina Coeli kraank waor en ziech door häöm wouw laote behandele woort heer nao Mestreech oontbooje. Dao woort Becanus zelf kraank en storf op zaoterdag 28 juni 1573 (sommege bronne zègke 1572). Zie graaf zouw ziech bevinde in de Aw Minnebreurekerk, althans d’n epitaaf.
Es geer uuch verbaas euver dit verhaol, kin iech uuch nog get sjoenders vertèlle! In de 18e iew maakde ‘ne gelierde ’t nog boonter: André Kempe beweerde tot God Zweeds spraok en Adam Deens! Meh…. let op, de slang (’t serpent zag heer) spraok Frans!
De plaots boe ’t perredies gelege heet weurt aanders ouch nog door e paar aander plaotse geclaimp o.a. örges in Tsjetsjenië. Iech voont e stökske in ’n gezèt oet 1998 boe-in de universiteit vaan Grozny beweerde tot Adam en Eva Tsjetsjeens gesproke hadde!
Nao dit verhaol bin iech eigelek hiel blij tot iech in Mestreech woen!
In ’n stad, die zoe kort bij ’t ( Antwerps ) Eerds Perredies ligk, moot me toch gelökkeg zien…….