Hagenbeck dee kaom ins kieke,
wie ’t oetzaog in de stad.
En heer zag: ” ’t Waor get veur de rieke,
es me hei ins bere zat”.
En ze kochten e hiel klein kuike,
goojekoup meh toch hiel fien.
En noe goon veer zoondags
mèt eus snake
nao de belastingbere zien.
Goon veer op eus kloompe,
goon veer door de Koompe.
Goon veer nao de bere touw,
en zègke: ”Noondezjouw!
Wat zien dat veur ’n dinger,
ze biete diech in d’n vinger!
Dat is weer ‘ne slummen trek,
vaan “Circus Hagenbeck.”

In ’t naojaor vaan 1919 doog “Circus Hagenbeck” Mestreech aon. Twie wèthawwers (eine waor wèthawwer vaan Oppen) raakde zoe oonder d’n indrök vaan de bere vaan dee cirk tot ze dachte: “Es veer hei in Mestreech ins e paar bere hadde, dat zouw erg leuk zien veur de lui. En …. es ’t e menneke en e vruike waor kóste veer ouch nog demèt fokke en zoe geld verdene!”
Afin, in 1920 köp de Gemeinte vaan cirkdirecteur Wilhelm Hagenbeck twie broun bere veur 1350 gölde. Dat waor in deen tied ’n enorm bedraag, dao bouwde me ziech bekans e gans hoes veur!
Meh, dach de Gemeinteraod, dat verdeent ziech gemekelek trök es veer einmaol aon ’t fokke zien.
De bere woorte oondergebrach in ’t Stadspark in ’n berekouw. Dat waor ’n iezere geval gemaak door de lierlinge vaan de ambachsjaol. Gans Mestreech góng zoondags nao de bere kieke. Veur de Mestreechtenere waor dat zoegezag ’n “attraksie zoonder vermakelekheidsbelasting” (volges Fons Tuinstra!).
En zoe kaom ‘t tot ederein in Mestreech wachde op gezinsoetbreiing vaan Max en Pol, want zoe waore ze intösse geduip.
Wat neet kaom waore klein beerkes want …. in de kouw zaote wie mennekes.
Ederein dach tot Hagenbeck de boel belazerd had! Dao zien toen leedsjes op gemaak en ein vaan die leedsjes is “Hagenbeck dee kaom ‘ns kieke”. ’n Aander waor:

De Gemeinteraod is gek,
De Gemeinteraod is gek,
‘r Heet ziech laote bezeike
vaan deen Hagenbeck.

Wie gerikklameerd woort bij Hagenbeck beweerde dee tot gelieverd waor wat de wèthawwers hadde oetgezeuk! Geine geluifde dat en dao woort al gedreig mèt e perces. De twie partije zien toch nog eins gewore zoonder e perces te veure. Dao woort nie mie gesproke euver wie dat misverstand oontstande waor.
Geer raojt ’t noets meh …. haos ’n iew later kump d’n aap toch nog oet de mouw!
Bij de prizzentatie vaan e book euver ’t stadspark in “Bookhandel Dominicanen” e paar jaor geleie, stoont opins  ’n awwer dame vaan euver de 90 jaor op en leep kordaot nao de mikrefoon. Zie begós dao oet te lègke tot de informatie, die teveure gegeve waor euver de twie door Hagenbeck gesjikde mennekesbere, neet klopde. Zie waor de dochter vaan wèthawwer vaan Oppen, de einege vaan de kinder die nog leefde, en ze vertelde tot häöre pa mèt Hagenbeck had aofgesproke um 2 mennekes te sjikke!
Want ……. häöre pa waor zoe preuts tot heer neet wouw höbbe tot iemes ’t zaog es de bere in ’t openbaar veur naogeslach zörgde!
Wijer zag ze nog tot zie neet snapde wie häöre pa aon kinder gekoume waor! 1)

Bronne:
1) Toon Jenniskens en Wim Gorren. Wim zaot bij de prizzentatie 2 rije achter de dochter vaan vaan Oppen en me kin mèt rech zègke tot heer dat alles vaan kortbij heet mètgemaak!