Iech gaon uuch noe e sjoen leedsje zinge
al klink ’t soms get raar.
’t Is aondoenlek haos veur te kriete
dat weurt geer wel gewaar.
Wèlt allemaol good hure,
nao ’t sjoens wat uuch weurt gebrach.
Es iemes soms ins eve moot pisse
dat heer daan mer effekes wach!

Veer zitte mèt ’t ganse gezèlsjap
in ier en däög bijein.
Veer koume allemaol nao dit fies touw
per oto neet per trein.
Veer make allemaol same
noe oonderein plezeer.
Es iemes soms ins eve moot pisse
daan kump dat vaan ’t beer!

De kok dee heet veur dit ete vaan alles
bijein gesjammeteerd.
Zoe’n 10 jäörkes same bijein zien
dat is de meujte weerd.
’t Is allemaol eve lekker
wat us hei gebooje weurt
Es iemes soms ins eve moot pisse
daan is heer nog neet aon de beurt!

Iech kin nog 35 couplètte
euver dit lustrumfies.
Ze goon allemaol euver de studente
neet propel en neet vies.
Twiemaol vief jaor bijein zien,
dat is ‘nen hielen tied
Es iemes soms ins eve moot pisse
daan kin heer ’t nog neet kwiet .

Dit is ’n intressant leedsje. ’t Geit euver e 10-jaoreg zjubilei dinkelek vaan iemes vaan de femilie Loontjens. D’n teks is (dink iech) gemaak door e lid vaan dees femilie. Meh, dit leedsje bestoont al zier lang in ‘nen aandere vörm! D’n historicus, d’n hier Lou Spronck, zeet ’t volgende euver dit leedsje:

’t Weurt “Contradictie Liedeken” geneump en umstreeks 1825 opgesjreve. Dinkelek is d’n teks  gemaak of bewèrk nao jannewarie 1814. ’t Is ’n ech oonsjöldeg volks gezèlsjapsleedsje, wat gezoonge woort mèt vrun en femilie es me get te väöl op had!                                                                                                               Theodoor Weustenraad heet umstreeks 1825 ’n aontal Mestreechse tekste aon ziene liermeister Johannes Kinker gegeve. Heibij bevoond ziech ouch “Contradictie Liedeken”. Iech geef uuch noe 2 couplètsjes vaan dit leedsje mèt d’n oersprunkelen teks.

Contradictie Liedeken

Ig gaun ug get verhole
en wat ik sek is wour:
de fomme zien gijn koolen
ijn naus en is gein our
en singen is neet fluijten
en huren is niet zien
en gooe eurt sien gein duijten
en Fransch is gij Latien

Rien-wien dat is gij water
aat beer is gijnen pis
ijn moor is geine kater
en Klaeske is niet Kris
den os is gijnen esel
ijn kooij dat is gei kaaf
ein hoer is ouch gyn kwesel
en gaans is ouch neet haaf

Bronne:
Mevrouw N. Loontjens
Lou Spronck