Pie Heunders

 

 

Pie Heunders
Pie Heunders
Wat höbstiech lekker weurs
Iech höb ‘rs vaan zes
vaan ach en vaan tien
Pie Heunders laot miech
dien weurs ins zien
Pie Heunders
Pie Heunders
Wat höbs tiech lekker weurs

De milledie vaan “Pie Heunders” is die vaan ’n aajd Hollands kinderleedsje: “Marijke, Marijke, wat kost er je groene thee”.

De Spekslachter Johannes Petrus Heunders, gebore in 1847, gestorve in1914, woende umstreeks 1885 oppe Merret.¹) Heer waor getrouwd meh volges de euverlievering naom heer ’t noe en daan neet zoe nej mèt d’n houweleksen trouw.
‘ne Kier had heer ’n affair mèt ’n zeker Sjana. Pie waor mesjiens get oonveurziechtig gewees en wat gebäört? Sjana raakde in verwachting. Of Pie toen niks mie vaan ziech leet hure, dat is neet bekind. Wat wel bekind is, is dat Sjana op hoeg pu nao de Merret trok um Pie de oere te wasse.
Zie begós in de winkel, boe alle klante bij waore, te sjendaole. Pie sjrok ziech ’n oongelök en umtot heer neet wouw tot zien vrouw get zouw merke en de klante dat alles zouwe mètkriege bedach heer wie heer de sjellende Sjana zoe gaw meugelek de deur oet kós kriege. Stief vaan de zenewe sjnapde heer ziech ’n pepèrre tuut, deeg ‘ne greep in de geldlaoj en duide die cent in de tuut. Dat waor volges de euverlievering 7 gölle. Sjana kraog die tuut in häör han geduid en Pie wèrkde Sjana de deur oet.
Dat heet Pie geweite! Dit verhaol góng es e loupend vörke door Mestreech. En Mestreechtenere zouwe gein Mestreechtenere zien es hei neet op gesjamp woort!
Zoewèl op Sjana es op Pie woort e leedsje gemaak, door wee weite veer neet. In Pie zie leedsje stoont zien weurs centraal. Iech kin uuch op e breefke geve tot me ’t hei neet had euver zien druugweurs of zien leverweurs!
En Sjana häör vot woort bezoonge in “En zeve gölle in ‘n tuut”.
Klik mer um bij d’n oetlègk vaan dit leedsje te koume.
Pie heet later nog in de Spèlstraot gewoend en vaanaof 1900 in de Breistraot. In 1914 is heer gestorve.

Op dezelfde milledie es “Pie Heunders” woort (volges ’n aonteikening dinkelek vaan Harie Loontjens) ouch d’n teks gezoonge: “Vaan Zante, Vaan Zante”.
Vaan Zante woende in Wiek op “De aander straot”. Heer had ‘ne winkel en verkoch dao vaanalles. Door ziene winkel leep d’n doorgaank nao “De zaajtpan”. De lui die klant bij häöm waore mochte vaan deen doorluip gebruuk make, aanders mooste ze umloupe.

Hei-oonder zeet geer de bladzij oet ’t aajd Hollands zangbundelke boe ’t leedsje “Marijke, Marijke, wat kost je groene thee” in steit.

Bronne:
¹) Geboortedatum en addres : “Boekèt Mestreech” door Lou Spronck en Flor Aarts.